Bli abonnent
Logg inn

nyhende

Torbjørn og tante Hanne står i ein gardssal med egg, rabarbrasaft og skiltet «Haugane Gard».
Torbjørn (3,5) og tante Hanne Vikse frå Haugane gard selde mellom anna egg og rabarbrasaft.

Bonde­marknaden samla små og store

Om lag 800 store og små var innom den bondemarknaden i Sveio sentrum søndag. Her var det mykje å både sjå, eta, oppleva og handla.

Elisabeth Hauge Bakke Frilansar
Publisert Sist oppdatert

Marknadsdagen starta med hausttakkegudsteneste i Sveio kyrkje. Til stor begeistring kom sauen André vandrande oppover kyrkjegolvet i lag med Sveio barnekor, og han oppførte seg slik ein veloppdragen ungdom helst skal gjera.

For sokneprest Trude-Christina Helgesen Halvorsen blei det ikkje teke ein såkalla selfie før ho og André gjekk inn i kyrkja. 

– Eg tok ein «saufie» av oss, eg, sa ho til Vestavind sin frilansar, som først trudde at nemnde sau sjølv hadde funne vegen inn for å høyra barnekoret synga.

Sauen André går inn i kyrkja saman med Sveio barnekor og Marianne Svarverud Hansen.
Sauen André, Sveio barnekor og Marianne Svarverud Hansen på veg inn i kyrkja.
Sokneprest Trude-Christina Helgesen Halvorsen tek selfie med sauen André framfor ei kvit trekyrkje.
Sokneprest Trude-Christina Helgesen Halvorsen tok ein «saufie» av seg sjølv og sauen André.
Sissel Fjellsbø står med sauen André inne i ei rikt dekorert kyrkje.
Kyrkjelydspedagog Sissel Fjellsbø og sauen André.

Lefser, honning og eplemost

I kvar ei bod og på kvar ein plass på marknaden blei det vist og fortald mykje av interesse. Jan Arne Tjomsland selde både lappar, tørre lefser, påsmurde lefser med og utan kanel, nordlandskaker og flatbrød. Han kallar foretaket sitt «Jans lefser og flatbrød», og hadde teke turen frå Førresfjorden til Sveio i lag med kona si Reidun Tjomsland. På bordet låg det også imponerande flotte og fargerike strikkearbeid.

Honning frå Brokanes vert produsert av Frode Rasmussen i Valevåg. Han kjem opprinneleg frå Danmark, men har slått seg til ro med familie i Sveio. Kona hans, «birøkterfruen» Astrid Jeanette frå Bråtveit i Sveio selde mellom anna fargerike pannebånd samt sanseleiker. Ein hobby ho har halde på med ei stund.

I Haugane Gard si salsbod sat 3-åringen Torbjørn og tante Hanne Vikse for å selja egg, eplemost, rabarbradrikk og anna. Dei tok også i mot bestilling av kjøt. Det siste tok tante Hanne seg av.

Mia Persson sit og strikkar ved eit bord med heimestrikka varer og juleklede til nissar.
Mia Persson og hennar heimestrikka grytelappar og sokkar, samt nye juleklede til nissar frå Gjenbruken.
Folk ved ein marknadsstand med honning, tekstilar og andre varer under eit telt.
Frå venstre Frode Rasmussen i Valevåg som produserar «Honning fra Brokanes». Til høgre står Mette og Harald Bua, Lars Bua og Helge Matre.
Fire ungdomar frå Lid 4H står bak ein raudmåla trestand med mat og drikke.
Arbeidsomme ungdomar frå Lid 4H. Frå venstre Simen Flatnes, Sofie Våga, Olav Matre og Olav Flatnes Skarveland.
To personar står bak eit bord med heimebakst, kaffi og andre varer frå Lid 4H.
Lilly Helland og Inger-Emilie Panayiotou frå Lid 4H freista med mykje god heimebakst og kaffi.
Marknadsbod med kassar fulle av gulrøter, salat, kål og andre lokale grønsaker.
På garden Eikeland Gods produserer Torgeir Eikeland frå Auklandshamn mellom anna økologisk ramsløk og granskotsirup.
Ingrid Askeland legg heimelaga bakst på eit bord under ein marknadsstand.
Ingrid Askeland etablerte i fjor Ingrids Bakeskap, Mikrobakeri i Sveio og hadde mykje godt å by på.
Iman sit på huk og klappar ein gamalnorsk sau gjennom eit metallgjerde.
9-åringen Iman sette seg på huk for å klappa gamalnorsk sau frå Skiftestad gard.
Astri Andersson står i ei raud salsbu med glas og flasker med frukt- og bærprodukt.
Astri Andersson gler seg over å kunna dyrka frukt og bær i byhagen i Texasbyen i Haugesund.
To menn står bak ein stand med grønsaker, matvarer og informasjonsmateriell.
Jon Bergmål og Helge Reinertsen representerte Sveio og Norsk Bonde- og småbrukarlag.
Alfhild Vikse ser på handstrikka arbeid ved ein fargerik marknadsstand.
Alfhild Vikse studerer Reidun Tjomsland sine handstrikka arbeid. I bakgrunnen sitt ektefellen Jan Arne Tjomsland, som selde lefser og anna som han sjølv hadde bakt.
Marianne og Kåre Bjelland sit ved eit trebord på Bondemarknaden i Sveio sentrum.
Marianne og Kåre Bjelland hadde mange godord om Bondemarknaden i Sveio sentrum.
Anne Grethe Rossehaug og sonen Hugo ved ein salgsstand med lys i ein hestehengar.
Anne Grethe Rossehaug og sonen Hugo hadde stand inne i hestehengaren. Dei selde heimelaga telyshaldarar og stearinlys.
Matheo Knutsen ligg avslappa i felgen på eit stort raudt traktordekk.
– Detta e sengå mi, sa 4-åringen Matheo Knutsen der han slappa av i eit traktordekk.


Astri Andersson frå Haugesund hadde sikra seg ei av dei solide salsbodene som Lions Club Sveio har bygd. Sjølv er ho busett i den såkalla Texasbyen i Haugesund, og prisar seg lukkeleg over å kunna bruka mykje tid i den store og vakre hageparsellen som i alt 101 leiligheter har tilgong til utanfor dørene. Ho selde mellom anna mykje solbæreddik samt rabarbra - og jordbærsyltetøy på marknaden. 

– Astri lagar verdas beste eddik, fortalde venninna hennar, Mia Persson. Ho sat sjølv like utanfor boda og strikka vidare på eit av sine mange prosjekt. 

Strikkesokkar og grytelappar, samt nye klede til gamle nissar frå Gjenbruken er noko ho likar å arbeida med. Pratsomme og blide Einar Amundsen med australsk cowboy-hatt på hovudet handla kaffi hjå 4H og serverte Astri og Mia. Han fortalde at han hadde starta sjølivet på eit dampskip, og avslutta på ei seglskute.

God heimebakst

Torgeir Eikeland frå Auklandshamn driv Eikeland Gods, der det veks økologisk ramsløk og gulrøter, fleire typar kål og andre grønsaker. På bordet stod det også granskotsirup, rips- og bringebærsaft, solbær- og blåbærsaft.

Fire born står bak eit bord med kreative hobbyting og korgarbeid på ein 4H-stand.
Born frå Lid 4H selde kreative hobbyting. Frå venstre Sølvi Handeland, Alina Gabrielsen Leirvik, Karoline Kvalvågnes Guddal og Tobias Haldin Solberg.

Anne Grethe Rossehaug og sonen Hugo sine sauetelyshaldarar laga av gips forsvann fort, men dei selde også heimeprodusera stearinlys og andre telyshaldarar. Dei hadde med seg si eiga salbod dei kallar hestehengaren, og der folk kunne koma inn og sjå alle produkta.

Ein smilande gjeng born frå Lid 4H selde ulike hobbyting. For ti kroner kunne store og små kjøpa små treplater i ulike fasongar, og som ein kunne skrapa på for å få fram vakre fargar og motiv. Like ved sytte fire andre 4H-ungdomar for å fylla på mykje god heimebakst og kaffi til to 4H-leiarar som tok seg av salet til svoltne og kaffitørste folk i alle aldrar.

Kåringsjå og sjølvforsyning

Kåringsjå samla store og små. Hege Vigre kunne seinare opplysa at 116 lam fordelt på ni produsentar stilte til kåring, der 102 av desse fekk lilla kåringsklype i øyra. Dei resterande vart «vraka».

Sauer i ein inngjerda binge medan barn og vaksne ser på under eit kåringssjå.
Kåringssjå og dyreutstilling samla store og små.

Utanfor Sveio soknehuset fortalde nestleiar i Sveio bonde- og småbrukarlag Jon Bergmål og Helge Reinertsen om eit vaksande behov for sjølvforsyning. Mellom anna om maten me kan produsera og lagra i ei tid kor landegrenser er stengde, og ein kan vera hindra frå å nytta arbeidskraft, strøm, energi, drivstoff og teknologi som må hentast utanfrå.

Gjetarhund-oppvisning

Sauebonde Benjamin Birkeland frå Stord og border collien Mist stilte opp på grasbakken aust for kyrkja der mange hadde møtt fram for å sjå og høyra. Birkeland har i mange år hatt interesse for hund og hundetrening, og har mellom anna jobba med dette eit halvt år i Wales. Mange gårdbrukarar tek kontakt med han når dei treng ein arbeidskollega heime på gården eller i fjellet.

Ein mann, ein border collie og tre sauer på ei grøn eng med åsar og hus i bakgrunnen.
Benjamin Birkeland frå Stord og border collien Mist i aktivitet på marka aust for Sveio kyrkje.

Bak årets bondemarknad står Sveio Sau og Geit, Sveio Bondelag, Sveio Bonde- og småbrukarlag, samt Lid 4H. Ut frå tilbakemeldingar frå fleire av dei, og mange besøkande, blir det truleg ein tredje Bondemarknad neste år.
landbruk nyhende sveio kyrkje sveio sau og geit lid 4h bondemarknad bildeseriar
Powered by Labrador CMS