nyhende
– Det blir magisk
Etter månader med førebuingar nærmar premieren seg for Haugesund barne- og ungdomsteater. 78 barn står på scena når «Kristiania magiske tivolitheater» inntar Festiviteten.
– De må gå til midten av scenen.
Line Remøy står midt i salen i Festiviteten i Haugesund. På scenen står to unge skodespelarar. No skal nesten elleve månadar med førebuingar og øving finna saman.
– Det er veldig mykje som må på plass, seier Remøy, som har regien i år.
Ei eiga kjensle
Vestavind er på det Haugesund barne- og ungdomsteateret kallar «Kost og mask», den første skikkelege gjennomgangen med sminke og kostyme.
Fredag er det premiere.
Før den tid må kulissar, kostyme, sminke, inn- og utgangar sitja perfekt. Stemninga er spent og konsentrert.
– Alle kjenner på den kjensla det er like før det brakar laus. Det er ei eiga kjensle å vera i Festiviteten, seier Remøy.
Årets framsyning er basert på NRK sin julekalender «Kristiania magiske tivolitheater». For Kathrine Aarsteinsen (17) har hektiske dagar i Festiviteten vorte ein tradisjon. Ho er inne i sin sjette sesong i teateret.
– Eg synest det går overraskande bra. Det er alltid litt nervepirrande før premieren, seier 17-åringen.
Mykje øving
Barne- og ungdomsteateret samlar unge skodespelarar og frivillige frå heile distriktet, mellom dei fleire frå Sveio. Nokre har meir røynsle enn andre.
Ein av dei er Even Haaland.
– Eg synest det er kjekt å stå på scenen, og eg gler meg veldig. Det skal bli kjekt å spele for publikum, seier Haaland.
I fleire månader har dei 78 skodespelarane øvd og finpussa replikkar. Medan dette har gått føre seg, har dugnadsgjengen mellom anna vore oppteken med kulissane. Kristian Haaland har snikra, hamra og designa i fleire veker allereie.
– Me er ein gjeng som har stått på lenge. Eg har laga skilt og dører og slikt. Heldigvis får eg litt kunstnarleg fridom, fortel han.
Men det er først denne veka han får sjå alt samla.
Fell på plass
– Det er veldig kjekt å sjå alle dei små elementa som kjem i hop. Du får ikkje sett heile biletet før alt er på scenen. Så er det spesielt å sjå dette saman med skodespelarane, seier Haaland.
Dei neste to vekene bur teatergjengen nærast i Festiviteten. Årets regissør oppsummerer vekene med eitt ord:
– Hektisk.
Likevel ville ikkje Remøy vore vekene forutan.
– Når alt kjem saman, med scenografi, skodespelarar og musikk, er det noko heilt spesielt som skjer med alle som er med. Det blir skapt magi kvar einaste kveld, seier Remøy.