Fekk førarkortet beslaglagt etter kollisjon

Politiet fekk klokka 19.38 onsdag melding om at to bilar var involvert i ei trafikkulykke. Det var ikkje meldt om alvorleg personskade, men store materielle skadar på bilane. 

Skjedde i 60-sone

Kort tid etter oppdaterte politiet med at dei involverte i ulykka var ut av bilane og oppe og gjekk. Vegen var sperra, men det var lite trafikk på staden.

Mesteparten av Halseidvegen ligg i Haugesund, men eit lite stykke ligg heilt sør i Sveio. Det var i 60-sone på dette strekket ulykka skjedde.

Føraren som er mistenkt for å ha forårsaka ulykka, ein mann i 50-åra, blei avhøyrt av politiet på staden. Etter avhøyr blei han køyrt til akuttmottaket i Haugesund for ein helsesjekk.

Kom over i motgåande køyrefelt

– Han har erkjent å ha vore uoppmerksam, og delar av bilen har kome over i motgåande køyrefelt. Han blåste til 0 i alkometeret. Førarkortet hans blei beslaglagt, og sak er oppretta. Førar og passasjer – to unge menn – i bilen som blei påkøyrt blei tatt med til legevakta for sjekk. Dei framstod uskadde, opplyser operasjonsleiar Olaug Bjørnsen ved Sør-Vest politidistrikt.

Rundt klokka 21.00 blei bilane henta av bilbergar, og politiet avslutta på staden. Det var skade på autovernet på ulykkesstaden, og entreprenør blei varsla.