Bli abonnent
Logg inn

nyhende

Sveio J12 i aksjon i sin siste kamp søndag. Sveio (i raude drakter) gjekk sigrande ut av kampen.

Fotballfest med 124 kampar

I helga var 81 fotballag, med spelarar i alderen 6-12 år, samla til Kiwi Cup på gras- og kunstgrasbanen i Sveio. Heile 124 kampar gjekk av stabelen på to dagar. 

Kjartan Moe Hustvedt
Kjartan Moe Hustvedt Frilansar
Publisert

Arrangørane er fulle av lovord både om deltakarane og alle dei som legg ned timar med frivillig arbeid både før, under og etter arrangementet. 

Det er to år sidan sist det var Kiwi-Cup i Sveio. I tillegg til å flytta cupen frå mai til september hadde dei i år gratis påmelding. Leiar for Kiwi Cup-gruppa i Sveio IL, Lene Tørresdal, synest det er gøy å sjå kor mange dei har klart å samla til fotballfest. Med så mange tilreisande er det ein god reklame for bygda å få visa fram både idrettsanlegg og leikeområde rundt skulen.

Murad Nurahmed Taha (t.v.), Theodor Haugen Bua, Elias Selland og Gabriel Krokedal Lie hadde spelt to av tre kampar då Vestavind møtte dei. Alle meinte cup var gøy.

Dagleg leiar i Sveio IL, Håkon Kvarme Thorsen, kan melda om gode tilbakemeldingar og ei knirkefri gjennomføring. Dei mange frivillige som trengs for å arrangere ein Cup i denne skalaen har vore lette å rekruttera. Så godt som heile juniorlaget til Sveio var og med på dugnaden, mange som dommarar, i tillegg til føresette og eldsjeler.

Sjå bildegalleri lenger ned i saka!

Bygdenamn

Baneansvarleg Gaute Haug fremma idéen om å gje banane lokale namn i staden for tal som ofte er vanleg.

Banemeister Gaute Haug, her med dottera Ellinor Miland Haug, var hjernen bak banenamna henta frå lokale stadar i Sveio.

– Det fungerte fint, og det var artig når trenarar og oppmenn kom for å spørja om vegen til Haukås eller Ryvarden, humrar Haug.

Vikse, Tjernagel, Ryvarden, Førde, Haukås, Liereid, Auklandshamn og Sveio var alle namn på banane i cuphelga. 

Fair play-pris

I sambrukshuset var det laga til kafé med ein rikhaldig kiosk. Rett på utsida blei det grilla hundrevis av hamburgerar til svoltne spelarar og publikummarar. 

Rundt på området gjekk ein av dei frivillige rundt med ei ekstra oppgåve både laurdag og søndag. Det blei nemleg delt ut to Fair play-prisar til lag eller personar som utmerka seg med god stemning og oppførsel.

– Me gjer det for å halda og heva fokuset på rettferdig spel, fortel cupleiar Tørresdal.

Sveio J12 kan heva deltakarpokalen etter ein sterk innsats i Kiwi Cup.
Både grasbanen og kunstgrasbanen var i bruk då Kiwi Cup gjekk av stabelen i Sveio laurdag og søndag.
Markus Bjelland (t.v.), Christian Dale og Noe Halseid var alle ein del av dommarlaget på Kiwi-Cup. Dette var dei første kampane dei dømde, etter dommarkurset i haust.
Daniel Hauge Bua (t.v.) og Askil Tvedte Ravatn kom springande og ville vera med i Vestavind. Dei meinte cup var storarta.
Halsnøy J12 storkoste seg på cup og meinte det var dei som hadde hatt med seg det fine vêret til Sveio søndagen.
Rebekka Lye (t.v.), Linn Therese Erve og Sissel Tøkje Andersen tok ein turn i kiosken ved kunstgrasbanen. Dei kunne melda om god stemning og kakesvoltne gjester.
Alle deltakarane fekk pokal, Kiwi-artiklar og måtte opp på scena etter at dei var ferdige med kampane sine.
Ida Kristine Ottesen og Bjørn Steinar Lillås var to av mange frivillige som var i sving under Cupen. Alle besøkande blei losa trygt til ein parkeringsplass.
Leiar for Kiwi Cup-gruppa og kasserar i Sveio IL, Lene Tørresdal, og dagleg leiar i Sveio IL, Håkon Kvarme Thorsen, var begge godt nøgde med oppmøte og gjennomføring.
kiwi cup fotball fair play bildeseriar nyhende sveio il sport frivillig arbeid
Powered by Labrador CMS