nyhende
Fuktskadar kan kosta kommunen 300.000 kroner
Kondens har ført til fuktskadar i eit klasserom og eit grupperom i Vestbygget ved Sveio skule. No må kommunen finna fram lommeboka for å utbetra skaden.
Publisert
Fuktspora vart oppdaga i himlinga i to av romma i Vestbygget. Ein takstmann vart henta inn for å undersøka årsaka og vurdera om vatn har tunge inn gjennom yttertaket.
Fiksa i sommar
Konklusjonen var at problemet skuldast kondens som oppstår fordi det er lagt plast på begge sider av isolasjonen i takkonstruksjonen. Denne løysinga kan føra til at fukt blir stengd inne i konstruksjonen og kondenserer.
Ifølge saksframlegget til rådmannen vart eitt av romma fiksa i sommarferien. Det andre rommet står for tur når skulen held stengt i haustferien.
Annonse
Blir haldne under oppsyn
Vestbygget vart oppført i 1993 og gjekk gjennom ei lettare rehabilitering i 2019. Takkonstruksjonen er frå det opphavlege byggeåret og var ikkje ein del av rehabiliteringa.
Rådmannen seier i saksframlegget at same takkonstruksjon finst fleire stadar i bygget.
– Det er per i dag ikkje registrert teikn til fukt eller kondens i dei øvrige romma. Desse områda vil bli haldne under oppsyn, og det vil bli sett i verk nødvendige tiltak i dei romma der det eventuelt blir registrert teikn til fukt eller kondens, skriv rådmannen.
Annonse
Utbetringane er anslått til å kosta rundt 300.000 kroner og blir henta frå driftsbudsjettet.