Bli abonnent
Logg inn

nyhende

Frå venstre: Bjørg Matre, Helge Matre, Ellen Reiersen, Astri Bøe, Kjell Sigmund Eilerås og Sigrun Eilerås. Det har vore mykje fest og kaffi på bedehuset, fortel gjengen. – Dei beste minna har eg frå tida i barnehagen, fortel Bjørg Matre.

Gåvedryss frå Bråtveit bedehus

Etter nærare 50 år har Bråtveit bedehus fått nye eigarar, og til saman 2.750.000 kroner er no fordelt på ulike foreiningar, lag og organisasjonar. Laurdag vart ein epoke avslutta med hagefest, mimring og gåvedryss på bedehuset.

Sigrund Breistig Frilansar
Publisert

Den største mottakaren var Sveio soknehus og Sveio bedehus, som fekk 55 prosent av pengane. Soknehuset sin del på 1 210 000 kroner skal setjast inn i eit vedlikehaldsfond for det eksisterande soknehuset. Sveio bedehus får om lag 300.000 kroner inn på driftskontoen.

– Tidlegare samla me inn pengar til arbeidet med soknehuset i Sveio, og seinare har me mellom anna sponsa lydanlegget der. Nå blir soknehuset i Sveio også vårt bedehus, sa Edvin Reiersen.

Gåver til bedehus og misjon

Vidare vart 15 prosent av pengane fordelte mellom lutherske organisasjonar, herav fleire bedehus i Sveio, og Pinsemenigheten Filadelfia. Under utdelinga kom det takk frå representantar for fleire av mottakarane.

Den største enkeltgåva til eit bedehus gjekk til Førde bedehus, som fekk 170.000 kroner.

Magnus Tveit og Edvin Reiersen har begge vore sterkt engasjert i arbeidet med Bråtveit bedehus, både når det kjem til vedlikehald, men og aktivitetar.
Lilly Krossgått Helland takka for pengegåvene til Lid 4H og Arbeidsstova, som held til på Lid skule.
Lutherske organisasjonar i Sveio blei tildelte 15 prosent av pengane frå Bråtveit bedehus. Den største delen fekk Førde bedehus med 170 000 kroner. – I dag kan me berre smila frå øyra til øyra, sa Bjarne Hovda, som representerte Førde bedehus saman med kona Sigrid. Frå venstre: Sigrid Hovda, Bjarne Hovda, Edvin Reiersen og Else Moldbrekke (Rød bedehus).
Sigrid Hovda, Sofie Våga og Helge Elias Tveit på det siste arrangementet i regi av Bråtveit bedehus.
Helge Elias Tveit og Øyvind Opheim representerte Lid Grendalag. Begge vart svært overraska og takksame for den store pengegåva til grendalaget. Pengane vil bli sette inn i prosjektet med sykkelbane. – Slik vil me vidareføra arbeidet med å skapa gode oppvekstmiljø og aktivitetar for born i krinsen, seier Tveit.
Frå venstre: Edvin Reiersen, Ellen Reiersen og Signe Halleraker. Signe Halleraker fortalde om ungdomsarbeidet som hadde vore aktivt på bedehuset. Tidlegare hadde dei grupper med Yngres og Yngstes, med mange utflukter både i og utanfor kommunen.
Kaffi, kaker og mimring over mange år med aktivitet på Bråtveit bedehus.
Nokre av dei mange gruppebileta frå over 40 år med barnehage på Bråtveit bedehus.
Ellen Reiersen og Magnus Tveit fortalde om søndagsskulearbeidet. Ei tid var det over 70 ungar som gjekk på søndagsskulen.
Celine Rossehaug viser farfar Leiv Rossehaug rundt på gamle stiar ho har trakka på i Bråtveit barnehage.
Bråtveit bedehus avslutta ein lang epoke med avskjedfest og utdeling av pengegåver. Her frå grilling på uteområdet. Frå venstre: Celine Rossehaug, Solveig Rossehaug, Greta Rød (bak Solveig), Johnny Stueland, Haldis Rolfsnes Stueland, Solbjørg Jacobsen og Judith Misje. – Me har hatt mange flotte og oppbyggjande samvær her, seier Judith Misje, som takka for gåva til Bua bedehus under utdelinga.
Hagefest med grilling og avskjed for Bråtveit bedehus.

Også misjonsorganisasjonane fekk sin del av gåvemidlane. Mellom anna fekk Norsk Luthersk Misjonssamband 70.000 kroner, som dei vil bruke på leirstaden Solgry.

Gåver til bygda

Dei siste 15 prosentane vart fordelte mellom lag og foreiningar i bygda. Lid grendalag fekk 310.000 kroner.

– Dette er eit godt bidrag til prosjektet vårt, sa Helge Elias Tveit, som fortalte om planane om å byggje ein større pumptrack-bane på grusbanen ved Lid.

Helge Elias Tveit takka for gåva til Lid Grendalag og fortalde om planane om å byggja ein sykkelbane på Lid.

– Me ønskjer å skapa eit tilbod som både kan gje glede til ungane i bygda og vera attraktivt for folk utanfrå kommunen, sa han.

Lilly Krossgått Helland takka for 50.000 kroner som gjekk til Lid 4H, og 50.000 kroner til Arbeidsstova.

– Me hadde planlagt å kjøpa ny symaskin til Arbeidsstova. No ser eg at me kan handla inn meir enn det, sa ho.

Lid 4H skal nytta gåva til nytt inventar til klubblokala sine. Sjå fullstendig liste over mottakarane nedst i saka.

Variert bruk gjennom åra

Bråtveit bedehus slik det står i dag vart innvia i 1978. Det kom etter at det tidlegare bedehuset brann ned i 1974. I mellomtida vart aktivitetane drivne frå loftet på gamle Lid skule.

Reiersen fortalde om den sterke vekkinga som prega Sveio på 1970-talet, og som skapte stort engasjement rundt bygginga av det nye bedehuset.

Gjennom åra var det stor og variert bruk av bedehuset.

–  Her har det vore barnehage, søndagsskule, yngresarbeid, konfirmasjonar, bursdagar, minnestunder, basarar, 17. mai-feiringar og møte for ei rekkje lag og organisasjonar. Det har vore tider med møter som varte i fleire dagar, fortalte Edvin Reiersen.

Blant bileta som blei vist fram frå tidlege år på bedehuset var også det første styret.

– Her var det mange menn, kommenterte Reiersen, men påpeika at dei i bedehussamanheng var tidleg ute med kvinneleg leiar. Lillian Krossgått vart vald som leiar på midten av 80-talet.

Prisvinnande friluftsbarnehage

Bråtveit barnehage vart oppretta i 1979. – Då eg såg fana i 17. maitoget for siste gong i 2023, kjende eg at det gjorde vondt, fortel Bjørg Matre, som har mange gode minne frå tida då ho jobba i barnehagen. Ei tid var ho også styrar her.

Ein stor del av historia til bedehuset handlar om Bråtveit barnehage, som vart starta i 1979 og driven fram til nedlegginga i 2023.

Bjørg Matre fortalde om ein barnehage som vaks frå å vera korttidsbarnehage til å bli ein prisvinnande friluftsbarnehage med høg fagleg kvalitet. Ho løfta fram korleis den kristne profilen har følgt barnehagen gjennom alle år, mellom anna gjennom jule- og påskevandringar.

– På julevandringa var me i sauehuset til ein nabobonde. Her lukta det fjøs, det var dunkelt og me fekk ei heilt spesiell stemning då juleevangeliet blei lese. Ei sterk oppleving, fortalde Matre.

– Meir enn berre eit hus

Prost Arild Steinsland vart rørt av forteljingane som kom fram.

– Bråtveit bedehus har vore så mykje meir enn eit hus. Her har det vore lått og løye, venskap, samhald og kjærleik. Det har vore med på å forma livet til mange menneske, sa han.

– Bråtveit bedehus har vore meir enn berre eit hus. Her har det vore lått og løye, venskap, samhald og hendingar som har endra livet for mange, sa prost Arild Steinsland, som også fortalde at pengegåva til Sveio soknehus skal setjast i eit vedlikehaldsfond for bygget.

Han peika på at sjølv om huset no er selt, lever mykje av arven vidare.

– Det har vore meir enn eit hus. Det har vore liv.

Med utdelinga vart verdiane frå Bråtveit bedehus fordelte i tråd med vedtektene for stiftinga. Desse slo fast at midlane ved opphøyr skulle gå til kristent arbeid og aktivitetar som kom lokalsamfunnet til gode.

Desse fekk gåver:

Den største mottakaren var Sveio soknehus og Sveio bedehus, som til saman fekk 1.512.000 kroner.

  • Sveio soknehus: 1.210.000 kr

  • Sveio bedehus: 300.000 kr

  • Frelsesarméen: 20.000 kr

  • Misjon Sarepta: 20.000 kr

  • Evangelisk Orientmisjon: 30.000 kr

  • Lys over land: 30.000 kr

  • Den Indre Sjømannsmisjon: 30.000 kr

  • Normisjon: 70.000 kroner

  • Indremisjonssamskipnaden: 70.000 kr

  • Det Norske Misjonsselskap: 70.000 kr

  • Norsk Luthers Misjonssamband: 70.000 kr

  • Lid 4H : 50.000 kr

  • Arbeidsstova : 50.000 kr

  • Lid Grendalag: 310.000 kroner

  • Bua bedehus : 25.000 kr

  • Tjernagel bedehus: 25.000 kr

  • Oa bedehus: 25.000 kr

  • Tittelsnes grendahus: 25.000 kr

  • 7-stjerna: 25.000 kr

  • Rød bedehus: 30.000 kr

  • Pinsekyrkja Filadelfia: 40.000 kr

  • Auklandshamn bedehus: 50.000 kr

  • Førde bedehus: 170.000 kr
nyhende
Powered by Labrador CMS