Gigantduell mellom hærførarane – med semifinale i potten

Kane og Haaland har gjort det same i årevis – skåra mål. Begge er historiske toppskårarar for landslaga sine. Og begge kjem til kvartfinalen i kjempeform.

Til saman har dei to spissane skåra 147 landsslagsmål. Så langt i VM-et i år står Kane med seks skåringar. Haaland har sju.

Englands gullgut

Harry Kane har vore sjølve symbolet på Englands angrepsspel sidan landslagsdebuten i 2015.

Med 85 mål på 119 landskampar er han den mestskårande herrespelaren i landet gjennom tidene. Han har passert namn som Wayne Rooney, Bobby Charlton og Gary Lineker, og få spelarar har betydd meir for England i moderne tid.

I meisterskapen i Nord-Amerika i år har han også passert Lineker som den engelskmannen med flest VM-mål. Totalt har Kane no 14 fulltreffarar.

2026-utgåva er Kanes tredje verdsmeisterskap. I Russland i 2018 skåra han seks mål, vann Gullstøvelen og leidde «Three Lions» til den første VM-semifinalen i landet sidan 1990.

I 2022 stoppa det mot Frankrike i kvartfinalen. No prøver 32-åringen frå Aust-London igjen.

Klubbforma gjer ikkje forventningane mindre. Etter 61 mål på 51 kampar for Bayern München kjem Kane frå det mange meiner er hans beste sesong i karrieren. Den forma har han teke med seg inn i VM.

Kopierte Ronaldo og Zlatan

Der Kane har vore Englands målgarantist i over eit tiår, har jærbuen Haaland skrive norsk fotballhistorie.

62 mål på berre 54 landskampar er ein statistikk som knapt verkar mogleg. Ingen norsk herrespelar har skåra fleire landsslagsmål, og ingen aktive landslagsspelarar i verda kan vise til eit betre skåringssnitt.

Tala blir endå villare når dei blir sette i perspektiv. Haaland har allereie skåra like mange landsslagsmål som Zlatan Ibrahimovic gjorde for Sverige og Ronaldo gjorde for Brasil. Forskjellen er at Zlatan brukte 122 landskampar og Ronaldo brukte 98, medan Haaland altså har gjort det på 54 kampar.

Forventningane til Noregs største stjerne var enorme før meisterskapen. Han har innfridd og vel så det.

Med to skåringar mot Brasil sende «Oksen fra Jæren» Noreg til den første VM-kvartfinalen i nasjonen i fotball. Samtidig auka han behaldninga til sju mål på fire kampar.

På dei 14 siste landskampane sine har han skåra 27 mål – eit skåringssnitt i ypparste verdsklasse.

Samanlikningane mellom Kane og Haaland har gått føre seg i fleire sesongar. Men dei to har berre spelt mot kvarandre to gonger. Begge oppgjera kom då dei herja i Premier League i 2022/23-sesongen.

No er scena større og forventningane skyhøge. I potten ligg ein plass i semifinalen.

Den neste milepælen

Det finst også ein interessant parallell mellom dei to.

Då Harry Kane leidde England til semifinale i Russland i 2018 i sitt første VM, var han like gammal som Haaland er i dag. Kane skåra seks mål, vann gullstøvelen og vart den store engelske profilen.

No har Haaland høve til å skrive eit nytt kapittel i norsk fotballhistorie.

Den norske spissen er allereie forbi Kanes 2018-tal i skåringar. Slår Noreg England laurdag, blir han også mannen som har leidd Noreg til den første VM-semifinalen i landet.

For England og Kane handlar kvartfinalen om å ta endå eit steg mot eit etterlengta VM-trofé. For Noreg og Haaland handlar det om å halde fram VM-eventyret nordmenn knapt torde å håpe på.

Uansett vil blikka rettast mot dei to spissane som har definert angrepsspelet til kvart sitt landslag.

Kvartfinalen mellom Noreg og England blir sparka i gang i Miami klokka 23.00 norsk tid.