Her er den nye politikontakten for Sveio

– Eg brenn for førebyggande arbeid, og blir motivert av å bygga relasjonar, arbeida langsiktig og bidra til tidleg innsats. Eg opplever at me får til dei beste løysingane når politiet, kommunane og andre samarbeidspartnarar arbeider saman, og det er nettopp det som gjer rolla som politikontakt så spennande for meg, seier Andersen.

Den nye politikontakten tek over etter Jostein Salemonsen, som etter fem år i rolla har valt å ta på seg nye utfordringar i politidistriktet.

Patrulje og førebyggande arbeid

Kine Andersen har arbeidd i politiet ti år, og har lang erfaring frå patruljeteneste i Haugesund og som praksisrettleiar. Det siste året har ho vore tilsett ved førebyggande avsnitt.

– Der har eg mellom anna arbeidd med oppfølging av ungdom, førebyggande arbeid retta mot utsette personar og tett samarbeid med skule, barnevern, psykisk helse, foreldre og andre samarbeidspartnarar. Eg arbeider også som førebyggande risikoanalytikar innan partnarvald, fortel politioverbetjenten. 

Ho meiner den tidlegare arbeidserfaringa hennar vil vera svært verdifull når ho no tek fatt på oppgåvene som politikontakt.

– Erfaringa frå patruljetenesta har gitt meg god innsikt i utfordringane lokalsamfunna våre står overfor. Gjennom arbeidet ved førebyggande avsnitt har eg blitt endå meir medviten om kor viktig det er å ha eit heilskapleg perspektiv og sjå utfordringar i samanheng, understrekar Andersen.

Tryggleik gjennom samarbeid

Politikontakten ser no fram til å bli betre kjend med kommunane og bygga vidare på det gode samarbeidet som allereie er der. Ho peikar på at mange av problemstillingane politiet arbeider med er komplekse og krev innsats frå fleire aktørar over tid.

– Det gjeld mellom anna arbeid knytt til ungdom, utanforskap, vald i nære relasjonar og andre forhold som kan påverka tryggleiken i lokalsamfunnet. Ingen løyser desse utfordringane åleine, og difor blir det viktig å bygga gode relasjonar og syta for godt samarbeid mellom politiet, kommunane og andre samarbeidspartnarar. Målet må vera å skapa tryggleik i lokalsamfunna, og det ser eg fram til å få bidra til, seier Kine Andersen.