Klar for ny innsamling til Ukraina

I eit stadig meir krigsherja Ukraina er det behov for det meste. Det er blitt mykje vanskelegare å driva hjelpearbeid, men hjelpesendingane frå Open Heart, leia av Halvard Hasseløy, kjem framleis fram.

Innsamling på fire stadar

Helga 24. og 25. oktober er det den årlege innsamlingsaksjonen SOS Ukraina i regi av Pinsekyrkja Filadelfia Auklandshamn. Laurdagen er det innsamling av varme klede, sko, tepper og andre ting det er bruk for ein kald vinter.

– Alt ein leverer må vera reint og heilt, men ein treng ikkje sortera. Legg det du vil gi i plastsekkar. Det er også bruk for madrasser, dyner, sengklede og reiskapar, seier Sveinung Andersen.

Mottaka i Sveio er som vanleg hos Filadefia Auklandshamn, ved soknehuset i Sveio sentrum, Førde bedehus og ved butikklokalet i Valevåg. Det blir loddsal på alle innsamlingsplassane, og på Bua bedehus sitt formiddagstreff tysdagen før.

Stor basar

– Me ber om 50 kroner i transportstøtte per sekk. Det er frivillig, men viktig for at transporten skal gå til sjølvkost slik at alt som kjem inn på basaren går uavkorta til Open Heart sine prosjekt i Ukraina, sier Andersen.

Han har vore basargeneral i ein del år. Basaren om søndagen er kjent for mange og fine gevinstar, og det kjem folk frå andre kommunar enn Sveio for å vera med. 

– I fjor fekk me inn 250.000 kroner. Om me klarar det i år gjenstår å sjå. Denne gongen blir det ein litt annleis  start på basaren. Me kjem til å ha ei kort markering av at bygget er renovert. Basaren blir første samling etter at alt er ferdig, seier basargeneralen, og lovar at alle som kjem får plass.