Kondolanse­protokoll og minneord om HM Kong Harald V

– Alle som ønsker det, er velkomne til å skriva ei helsing til minne om Kong Harald V, seier ordførar André Mundal Haukås.

Helsingane blir tekne vare på og formidla vidare i samsvar med nasjonale retningslinjer.

Laurdag blei kondolanseprotokollen flytta til Sveio kyrkje i samband med open kyrkje for å minnast kong Harald.

Måndag er kondolanseprotokollen tilbake på kommunehuset. Der blir den liggande til kong Harald si gravferd. Måndag og tysdag utvidar kommunehuset opningstida til klokka 17.00 slik at flest mogeleg skal få høve til å skriva si siste helsing.

Blomehelsingar

Over heile landet er det og vil det bli lagt ned blomar til minne om den kjære folkekongen. Sveio kommune tilrår at dette blir gjort ved kongebjørka på Haraldsplass i Valestrand eller utanfor kommunehuset. Begge stader er det lagt ned blomar på vegner av Sveio kommune.

Minneord

Sveio kommune har også lagt ut eit minneord:

Det er med stor sorg vi har motteke bodskapen om at HM Kong Harald V er gått bort, 89 ½ år gamal.

Kongen har vore ein kjær og trygg leiar for det norske folket sidan han overtok trona då Kong Olav V døydde 17. januar 1991. Kongen valde valspråket «Alt for Norge», slik det og hadde vore for faren og farfaren hans.

Kong Harald blei «folkekongen» alt då han vitja Sunnmøre etter den kraftige orkanen som råka området 1. januar 1992. Synet av ein konge i regntøy og gummistøvlar som trøysta og synte omsut for dei som var hardt råka av øydeleggingane, gjorde sterkt inntrykk på heile folket. I åra som følgde, blei kjærleiken mellom folket og monarken sterkare og sterkare.

Kong Harald var oppteken av å modernisera monarkiet og tilpassa det til ei ny tid, samstundes som han førte vidare ein tradisjon som strekkjer seg meir enn tusen år attende i tid. Kongen klarte dette!

Kongen ville svært gjerne vera statsoverhovud for alle nordmenn, uavhengig av kjønn, etnisk bakgrunn, religion, bustad og legning. Han sette ord på dette gjennom talar som sette spor etter seg. Det han sa og gjorde etter terroråtaka i Regjeringskvartalet og på Utøya 22. juli 2011, var svært viktig for alle, både dei som var direkte råka og heile folket.

Mange i Sveio minnast med glede då HM Kong Harald vitja kommunen vår 30. april 2001 i samband med den høgtidelege opninga av Trekantsambandet. Besøket på Ulveraker er framleis minna gjennom namnet Haraldsplass. Det var ein stor dag for Sveio og heile Sunnhordland, og vi skulle så gjerne fått høve til å ønskja Kongen velkomen tilbake til kommunen.

På vegne av innbyggjarane i Sveio sender eg våre varmaste tankar til Hennar Majestet Dronning Sonja, den kongelege familien og alle som sørgjer over Kongens bortgang.

I respekt og kjærleik ønskjer vi sveibuar fred over HM Kong Harald V sitt minne.

André Mundal Haukås
Ordførar i Sveio

– Han var hele Norges bestefar