nyhende

Utbrot av fugleinfluensa krev sanering hos dei som er ramma. Foto : Berit Roald / NTB / NPK

Krev betre erstatningsordning for fjørfenæringa

- Å måtte avlive alle dyra sine er ei stor påkjenning. Bøndene har meir enn nok å handtere i ein slik situasjon, og dei skal sleppe å uroe seg for det økonomiske, meiner Bjørn Gimming, leiar i Norges Bondelag.

Publisert

I eit brev til Landbruks- og matdepartementet i dag ber Bondelaget og Småbrukarlaget om at det straks blir gjort endringar i erstatningsordninga ved offentleg pålagd avliving og sanering.

Norsk fjørfenæring er ramma av det hittil største utbrotet av fugleinfluensa nokon gong. Om lag 100.000 fjørfe er avliva eller må avlivast.

Bondelaget meiner erstatningssatsane ikkje har følgt kostnadsutviklinga i landbruket. For ein gard med 7500 høner frå kjønssorterte egg, kan satsane i dag bety eit tap på 480.000 kroner berre på verdien av dyra.

- Samfunnet er avhengig av at bøndene varslar tidleg ved mistanke om smitte. Når bonden blir pålagt å avlive dyr og sanere, er det av dyrevelferdsomsyn og for å hindre at smitten spreier seg til andre gardar. Også då gjer bonden ein jobb for fellesskapet. Derfor må fellesskapet ta sin del av rekninga, seier Gimming i ei pressemelding.

Powered by Labrador CMS