nyhende

Influensasmitten blant nordmenn aukar, noko som kan gjera at smittetoppen kjem tidlegare enn vanleg. Nemleg i jula.

Mange kan få influensa til jul

Influensasmitten blant nordmenn aukar, noko som kan gjera at smittetoppen kjem tidlegare enn vanleg. Derfor kan mange få ei snørrete gåve til jul, i staden for på nyåret.

Publisert

– Me reknar det som ganske sannsynleg med den vekentlege auken i positive testar, seier overlege Ingvild Fjeldheim ved Folkehelseinstituttet (FHI) til TV 2.

Vanlegvis treffer viruset hardast anten rett over nyttår eller tett opp mot vinterferien. I fjor toppa smitten seg òg i jula.

Høgare nivå enn vanleg

Influensasmitten ligg på eit litt høgare nivå no enn han pleier, ifølgje Fjeldheim. Førre veke var andelen med påvist influensavirus på 7 prosent. Veka før, altså veke 45, låg smittetalet på 6 prosent.

– Den siste veka var førekomsten høgast i aldersgruppa 1 til 4 år, der 10 prosent av dei testa fekk påvist influensavirus, seier Fjeldheim til kanalen.

Flest i nord og aust

Det er fylka Troms, Finnmark og Østfold som har høgast smitte til no.

FHI melder at viruset smittar ved drope-, luft- eller kontaktsmitte og kan smitta ved låg smittedose.

– Det betyr at alle samlingar med mykje folk innandørs vil vera gunstige for smittespreiing, seier Fjeldheim til kanalen.

Powered by Labrador CMS