No blir barne­hagen lyst ut på anbod

Alt i 2016 starta kommunen planlegginga av ein ny barnehage i Sveio sentrum. No skal prosjektet lysast ut på anbod etter at kommunestyret gav si tilslutning.

Rådmann Jostein Førre ynskjer å lysa ut barnehagen på anbod for å sjå kva tilbod kommunen får. Samtidig vil han at entreprenørane skal prisa fleire moglege innsparingstiltak som opsjonar.

Då saka blei behandla i formannskapet, blei det vedteke at innsparingstiltaka skulle takast med som opsjonar i konkurransegrunnlaget.

Samrøystes kommunestyre

I saksframlegget blei det peikt på tre tiltak som samla kan gi ei innsparing på rundt 2,15 millionar kroner.

Eit samrøystes kommunestyre var likevel usamd med formannskapet.

Kommunestyret meiner at det ikkje på førehand skal leggjast inn konkrete reduksjonar i kvalitet, funksjonalitet eller innhald. Tilbydarane skal sjølve visa korleis kommunen kan få ein best mogleg barnehage innanfor kostnadsramma og dei fastsette krava.

Under behandlinga viste Asle G. Halleraker frå Tverrpolitisk fellesliste til at den planlagde barnehagen ikkje er eit luksusprosjekt, men ei nødvendig erstatning for eit gammalt og utdatert bygg.

– Me må rusta oss for alle innbyggjarane i Sveio. Då kan me ikkje berre tenkja på dei eldre, men òg på dei unge. Me må halda oppe tempoet i prosjektet, var bodskapen hans.

John Kr. Økland frå Høgre understreka at eit breitt fleirtal står bak den vedtekne kostnadsramma.

– Det er ikkje føremålstenleg å byggja utan funksjonane som er trekte ut. Det står eit breitt fleirtal bak vedtaket som er gjort, og det er ingenting som tilseier at prosjektet ikkje står seg, sa Økland.

Rådmannen åtvara

Rådmannen åtvara mot å bruka beløpet som ein absolutt makspris i konkurransen. Han meiner ei slik løysing kan føra til at tilbod over grensa må avvisast, og dermed redusera konkurransen. Rådmannen understreka også at kostnadsramma omfattar meir enn sjølve barnehagebygget.

Dagens barnehage har tre avdelingar og inga eiga tilrettelagd avdeling. Ifølgje Førre er bygget både gamalt og trongt.

Like før sommaren 2023 vedtok kommunestyret å byggja ein ny barnehage med ei kostnadsramme på 44 millionar kroner. Samstundes vedtok politikarane å redusera prosjektet til tre ordinære avdelingar og éi tilrettelagd avdeling. I april 2026 auka politikarane kostnadsramma til 55 millionar kroner.

Arbeidarpartiet sin Linn Therese Erve var utolmodig på vegner av prosjektet.

– No må me få realisert bygginga av denne barnehagen. Oppgåva vår er å tilby gode tenester til innbyggjarane våre. Samstundes skal me sikra at det er attraktivt å flytta til denne kommunen. Me må få spaden i jorda på eitt av dei viktige prosjekta i kommunen, sa Erve.

Vil øka ramma

Den siste kalkylen er på 66,2 millionar kroner. Det er 11,2 millionar kroner meir enn den vedtekne kostnadsramma.

Kjartan M. Hustvedt frå MDG føreslo å auka ramma til 66,2 millionar kroner. Framlegget fekk fem røyster, frå MDG, SV og Arbeidarpartiet, men fall mot 16 røyster.

Infrastrukturen til barnehagen og helsesenteret er allereie ute på anbod. Planen er å lysa ut sjølve barnehagen i desember. Det er førebels uvisst når barnehagen kan stå ferdig, men Førre har tidlegare anslått at det kan skje mot slutten av 2028.

Asle G. Halleraker frå Tverrpolitisk fellesliste og John Kr. Økland frå Høgre fremja framlegg som var likelydande på dei tre første punkta. Desse punkta vart samrøystes vedtekne.

Ueinige

Dei to var likevel usamde om kva som skulle skje dersom barnehagen ikkje kan byggjast for 55 millionar kroner.

Halleraker føreslo at saka i så fall skal tilbake til kommunestyret før ein kontrakt kan inngåast. Rådmannen skal samstundes konkretisera kva som må gjerast for å få prosjektet gjennomført.

Halleraker sitt framlegg vann med 16 mot fem røyster. Høgre sine representantar utgjorde mindretalet.

Kommunestyret handsama også eit tilleggsframlegg frå Kristian Haaland i Arbeidarpartiet. Han føreslo at det skal kallast inn til eit ekstraordinært kommunestyremøte dersom tilboda kjem inn over kostnadsramma.

Framlegget vart vedteke med 16 mot fem røyster.

Jarle Jacobsen frå KrF og Høgre-representantane John Kr. Økland, Svein Olaf Bua, Carl Enoksen og Mikal M. Hovda røysta mot tilleggsframlegget.