Norgespris-auken: Regjeringa sparer 1,2 milliardar

I statsbudsjettet for neste år har regjeringa foreslått å auke noregsprisen frå 40 øre/kWh før moms til 45 øre/kWh.

No har både SV og Senterpartiet bede om tal på korleis endringane slår ut for pengebruken, og kor mykje meir det vil koste å behalde noregsprisen slik han er i dag.

– Utgiftene ved noregspris på 40 øre/kWh eksklusiv meirverdiavgift blir rekna til i underkant av 13,2 milliardar kroner. Dette er ein auke på i underkant av 1,2 milliardar kroner samanlikna med ein noregspris på 45 øre/kWh eksklusiv meirverdiavgift, skriv Finansdepartementet i svaret sitt til Senterpartiet.

I berekningane er det lagt til grunn at 70 prosent av hushalda i Sør-Noreg vel noregspris, og 25 prosent av hushalda i Midt-Noreg.

Blir tema i budsjettforhandlingane

Regjeringa valde i budsjettforslaget for 2027 å auke noregsprisen med 12,5 prosent, medan den generelle prisveksten er venta å vere på 2,7 prosent.

Statsminister Jonas Gahr Støre (Ap) har grunngitt auken med auka straumprisar.

– Det at vi aukar frå 40 til 45 øre vil framleis gi ein stor tryggleik for ein lågare pris for familiar. Ein familie kan framleis spare 8.000–9.000 kroner på å velje noregspris, sa Støre til NTB då regjeringa la fram budsjettforslaget i oktober.

Fleire av budsjettpartnarane til regjeringa har reagert på prisauken. Både Senterpartiet, Raudt og SV seier nei, og saka blir tema i budsjettforhandlingane.

Har vorte dyrare

Noregspris-ordninga har vorte langt dyrare for regjeringa enn dei først trudde. Årsaka er høgare straumprisar i Noreg og ute i Europa.

I vår oppjusterte regjeringa kostnadsoverslaget for noregspris og straumstøtte med rundt 10 milliardar kroner. Totalt reknar dei med å bruke 21,5 milliardar kroner i år.

Neste år reknar regjeringa med å bruke om lag 16,4 milliardar kroner på noregspris og straumstøtte for straum og fjernvarme.

Auka inntekter

Men dei høge straumprisane har òg ført til kraftig auka inntekter til staten frå kraftproduksjon.

Inntektene til staten frå grunnrenteskatt frå kraftproduksjon er berekna til 33,1 milliardar kroner i 2026. I tillegg får staten eit utbytte på 8,4 milliardar kroner frå Statkraft i år.

Neste år fell inntektene noko. Ifølgje statsbudsjettet blir grunnrenteskatten anslått å ende på 21,1 milliardar kroner, medan det er venta eit utbytte frå Statkraft på 10,6 milliardar kroner.