Ny undersøking: 8 av 10 varer billigare på nett enn på taxfree

Prisjakt har samanlikna over 1400 produkt innan skjønnheit og velvære som blir selt på norske flyplassar, og i norske nettbutikkar. 78 prosent av varene var billigare på nett, og heile 50 produkt kostar over dobbelt så mykje på taxfree.

– Feil framstilling

Travel Retail Norway, som driftar taxfree-butikkar på Avinors største flyplassar i Noreg, meiner likevel at undersøkinga gir eit feilaktig bilete av prisforskjellane.

– Prisjakt gjer kvart år ei veldig skeiv undersøking der dei medvite lagar ei feil framstilling av røyndommen gjennom eit skeivt produktutval og falske premissar, seier Haakon Dagestad, viseadministrerande direktør i Travel Retail Norway, i ein e-post til NTB.

Nettbutikkane som er undersøkte, er i hovudsak utanlandske butikkar som ikkje har varene på lager, meiner han. Det er heller ikkje teke høgd for fraktpris når prisane blir samanlikna.

– Kundane våre kan vere trygge på at dei gjer gode kjøp og får ekte produkt med seg i handa når dei er i butikkane våre, seier Dagestad.

– Det stemmer ikkje

Prisjakt avviser kritikken frå Dagestad.

– Det stemmer ikkje. Nettbutikkane som inngår i undersøkinga, er registrerte i Noreg og ein del av norsk netthandel. Dei har ofte dei beste prisane på produkta i undersøkinga vår, seier Isabella Ahmadi, forbrukaranalytikar og pressekontakt i Prisjakt i ein e-post til NTB.

– Utvalet er basert på populære og velkjende varemerke og produkt innanfor dei ulike kategoriane. Det er same produkt, i same storleik, som blir samanlikna med kvarandre, forklarer ho.

Ho seier at det berre er produkt som var på lager då undersøkinga vart gjennomførte, som er inkluderte. Medlemsprisar inngår heller ikkje i undersøkinga.

– Fraktkostnaden er ikkje medrekna ettersom han kan variere, avhengig av leveringsmetode og storleiken på kjøpet. Det er sjølvsagt bra å rekne med ein ekstra fraktkostnad om ein handlar online, sjølv om fleire nettbutikkar tilbyr gratis frakt, skriv ho.

Trur på 25 prosent rabatt

Ei undersøking frå Opinion viser at fire av fem nordmenn trur produkta er 25 prosent billigare på taxfree enn i vanlege butikkar. Prisjakts kartlegging viser kategoriane med dei største prisforskjellane:

Kroppsoljer: 44 prosent dyrare på taxfree

Parfymar: 34 prosent dyrare

Handkremar: 21 prosent dyrare

Solkremar: 21 prosent dyrare

Ansiktsrens: 20 prosent dyrare