Støre om auken i noregspris: – Står seg

– Det er jo rekna med at prisane kan komme til å stige mykje. Så der skal vi finne eit balansepunkt. Og vi har jo lagt mykje større vekt på kva prisane er i dag enn det dei kan komme til å bli, seier Støre til NTB.

– Straumstøtta er ei av dei største satsingane i statsbudsjettet, slår han fast.

Opp 5 øre frå neste år

Tysdag blei det kjent at regjeringa foreslår å auke noregspris frå 40 til 45 øre per kilowattime, pluss moms. Det utgjer ein prisvekst på 12,5 prosent.

Fleire av budsjettpartnarane til regjeringa har reagert kraftig på prisauken. Både Senterpartiet, Raudt og SV meiner han er altfor høg.

– Det at vi aukar frå 40 til 45 øre vil framleis gi ei stor sikkerheit for ein lågare pris for familiar. Ein familie kan framleis spare 8.000–9.000 kroner på å velje noregspris, påpeikar Støre.

– Og det meiner vi gir dei tryggleik og føreseielegheit i økonomien.

Noregspris vil førast vidare til 2029

Energiminister Terje Aasland (Ap) forsvarer auken med at spotprisen på straum har vorte langt høgare enn regjeringa estimerte i fjor haust. Han seier at eit hushald i Sør-Vest vil få 8.700 kroner i støtte neste år, basert på eit forbruk på 16.000 kWh.

Den totale ramma for straumstøtteordninga er sett til 16,4 milliardar kroner i statsbudsjettet for 2027. Støre held fast på at noregspris vil førast vidare ut stortingsperioden, fram til valet i 2029.

Tvert nei frå Senterpartiet

– Vi ser ikkje at det er nokon grunn til at folk skal få vesentleg dyrare straumpris. Dette er beviset på at straumpolitikken i Noreg er feilslått, seier energipolitisk talsperson for Sp, Maren Grøthe, til NTB.

Endring frå 40 til 45 øre utgjer ein prisauke på 12,5 prosent, noko som er vesentleg høgare enn resten av prisveksten.

For ein familie på fire som bruker 25.000 kilowattimar straum i året, inneber prisauken at straumrekninga aukar frå 12.500 til vel 14.000 kroner i året.

– Vi meiner at regjeringa no heller burde ha brukt energien på faktisk å få ned straumprisen og behovet for straumstøtte, seier Grøthe, som også viser til at staten tener godt på straumeksport og høge straumprisar.

Og nei frå Raudt

– Raudt er mot forslaget om auka noregspris, slår energipolitisk talsperson for partiet, Bjørnar Moxnes, fast overfor NTB.

– Noregspris skulle gi folk tryggleik og føreseielegheit i møte med ein ustabil marknad. No må norske hushald ta rekninga fordi kraftprodusentane tener på høge straumprisar under ei internasjonal energikrise, og fordi krafteksporten var rekordhøg førre år, med lite vatn i magasina som resultat, seier han.