nyhende
Ut på tur, aldri sur?
Norsk Friluftsliv og Hold Norge Rent oppmodar alle til å ta ein «tur med meining» i sommar. Organisasjonane går no saman for å få fleire til å vise meir omsyn – og alt som skal til, er ein pose i sekken.
– Dette er noko alle kan vera med på, anten du skal gå langt eller kort, åleine eller med familien, seier fungerande generalsekretær Siri Meland i Norsk Friluftsliv i ei pressemelding.
Konseptet «tur med meining» handlar ikkje om å rydda heile skogen, men om å gjera ein liten forskjell ved å plukka med seg det søppelet ein finn på vegen.
– Når mange gjer litt, blir det samla bidraget stort, understrekar Meland.
Ei fersk undersøking frå Miljødirektoratet viser at heile 8 av 10 nordmenn seier at søppel er det som øydelegg naturopplevinga mest, og 57 prosent opplever at forsøpling førekjem ofte eller svært ofte.
Annonse
Mange irriterer seg òg over hundebæsj på stiar og i løyper. Heile 67 prosent seier det er irriterande å møta på dette på tur. Heldigvis er dette eit enkelt problem å fikse.
– Det du tek med deg ut, tek du òg med heim att. Bruk fleirgongutstyr framfor eingongs, og pass på at søppelet du skal ta med heim blir lagd i ein pose i sekken, slik at det ikkje fell ut av lommer eller av sekken ved uhell, seier generalsekretær Cecilie Lindvall Wendelboe i Hold Norge Rent i pressemeldinga.