nyhende
Verftsindustrien i Sunnhordland treng hjelp frå staten
Vestland fylkesting ber staten om tiltak for å møte den krevjande situasjonen i verftsindustrien på Stord, der fleire store petroleumsretta prosjekt er på veg mot slutten og nye oppdrag ikkje kjem raskt nok.
– Ordrebøkene til Aker Solutions står i fare for å bli tomme, og det får konsekvensar langt utover verftsporten, seier fylkesordførar Jon Askeland i Vestland.
Fylkestinget meiner svikten i oppdrag kan få følgjer for både underleverandørar, tenesteytande næringar og arbeidsplassar i Sunnhordland og resten av Vestland. Aker Solutions har tidlegare hatt 2.000 faste og 9.000 innleigde arbeidarar og kjøpt regionale tenester for rundt fire milliardar kroner.
Fylkestinget ber mellom anna om statlege omstillingsmidlar til Stord og Sunnhordland i statsbudsjettet for 2027, investeringar i infrastruktur og betre handlingsrom for rask omstilling. Det ønskjer også at staten bidreg til at havvind og annan framtidig havaktivitet gir oppdrag til norske verft og leverandørindustrien.